හරි පුදුම ඉස්කෝලෙ

ලංකාවෙ අපි හිටිය

ගේ වටට ඉස්කෝලෙ

ඒත් අපෙ පොඩි පුතුට

ඉඩ තිබුනෙ නෑ එකක

ඉපදිලා පස් වසර

ගෙවුනෙ රටවල් දෙකක

පදින්චියෙ තහවුරැව

පෙන්නන්නෙ මොන බිලද?......

ටෝකියොවට ඇවිත්

ගෙවුනෙ නෑ සිව් මසක්

පොඩි එකා දැන්  ඉන්නෙ

ගේ මුලම ඉස්කෝලෙ

යාන වාහන වලින්

එන්න බෑ පාසලට

ඉතින් කවුරැත් ඉන්නෙ

පයින් ඇවිදින දුරක

TERM TEST ඇගයීම්

නිළ ඇදුම් මොකුත් නැති

සොබා දහමට බැදුන

හරි පුදුම ඉස්කෝලෙ...

ගෙවුන සති අග යෙදුනා

වසරෙ ක්‍රීඩා උළෙල

ඇරඹුමයි නැවතුමයි

තත්පරේටම තිබුනා...

අර ලොක්කා මේ ලොක්කා

කාටවත් නෑ අසුන්

ඉදගන්න ඉඩ තිබුනෙ

ගැබිනි, වියපත් අයට....

පාට පාටින් මහපු

ඇදුම් පැළදුම් නැතුව

මේ ලෝකෙ මම දැකපු

සරල සුන්දර උළෙල....

නිල් පාට SHORT එක

සුදුයි T SHIRT එක

පිටින් රතු නොපිට සුදු

තොප්පියකි හැමොටම....

රතුපාට අකා ගුමි

සුදුපාට ශිරො ගුමි

නිවාසාන්තර උළෙලෙ

ඔය නමින් හවුස් දෙක....

රතුපාට තොප්පියම

නොපිට හරවලා දාපු

ශිරො ගුමි පැටව් ටික

සුදු පුලුන් වගෙ දුරට

ප්‍රාථමික පාසලේ

හයේ පන්තියයි ලොකු

දෙසිය දෙක හෝ හතර

පන්තියක උපරිමය....

50m දිව්වා

එක වසරෙ බට්ටො ටික

එක පෙලට හය දෙනයි

තුන ගානෙ නිවාසෙට...

නිවාසය දිනවන්න

වෙර යොදා වර නැගු

පොඩි එවුන් සිහිකලා

මට මගේ බාලවිය

දෙසිය දෙදෙනෙක් දුවපු

මහා ධාවන තරගෙ

නිමවෙන්න ඇත්තටම

ගියෙ නෑනෙ අඩ පැයක්

ළමයි තෝරන තරග

තියෙන අපෙ මව්බිමේ

කල්පයක් ගියත් තව

කොහෙද පිලිවෙල මෙහෙම...

අඩ පැයට මදක් වැඩි

විවේකය මද්දහනෙ

එලා පැදුරක් මිදුලෙ

කෑවා බත් ගුලි එක්ව

විදුහලේ ප්‍රධානියා

කියලා වෙනසක් නැතුව

ඔහු ඇතුළු ගුරැවරැත්

ඇන්දෙ නිල් සුදු ඇදුම....

එකා පිට එකා නැගි

ජිම්නාස්ටික් සරඹ

වැටෙන අය අල්ලන්නෙ

අනේ අර ප්‍රින්සිපල්.....

කුසලානෙ පිරිනමා

උත්සවය නිමාවිය

පොඩි එකෙක් කල පසුව

ස්තූති කතාවක්...

තෑගි ලැබුනේ පසුව

හැමෝටම පන්තියෙදි

පාසලේ නම රැදුන

යතුරැ ඇමුණුමකි එය...

උත්සවය පුරාවට

මගෙ මතක අවදි කල

ටොට්ටො චන්ගේ පුටුවෙ

අද ඉන්නෙ මගෙ පුතා....

-සඳමාලි සකුන්තලා